عقده نفسيه مابي احلها

0
حين كنت صغير .. كنت دايما اقول لبوي .. يبه صج الدجاج طيب ..  فكان يسالني ليش طيب .. فارد عليه .. عشان كل يوم يبيض ويعطينا بيض ناكله ... فكان يسكت ومايتكلم ... ولما كبرت شوي ... تغيرت نظرتي ... فكنت اقول لبوي .. يبه .. صج الدجاج مخلص ... فكان يسالني ليش مخلص ... فارد عليه ... عشان عنده ريش ومايطير عشان مايحرمنا من البيض .... فكان يسمع ومايعلق

 ولما كبرت وصرت شاب ... تغيرت نظرتي ... وقمت اقول لنفسي ... صج الدجاج غبي ...  يتعب نفسه واحنا ناكل بيضه ... وعنده ريش وش كثره ومايطير وينحاش ويفك عمره .. وغبي اكثر ... انه مايتطور .. ولا يبي يتطور .. عايش عاله على غيره عشان شنو .. ان عنده بيض .. ياسيدي مانبي بيضك

 ... بعد سنين تذكرت ان الدجاج انثى .. مدري وشلون تذكرت هالشي ,, مع انه شي طبيعي ان الدجاج انثى .. فقمت افكر ... وشلون اكل بويضتها ... اللي مفروض تجيب بداخلها اطفال .. وياترى ... اهي مسامحتنا ناكل بويضتها .. وييييييييييييييييع بويضه

 كرهت البيض .. وماقمت اكله .. لكن المشكله مانتهت .. امي ....تطبخ الدجاجه ... وتقدمها لنا عاريه بالكامل فوق العيش .. وانظر اليها بعين خفيه ... وانا مستحي .. الدجاجه مفسخه ومطبوخه .. ياترى .. ان مديت ايدي على فخذها ... وش يقولون الناس .. يدور فخوذ ... كرهت اكل الدجاح ... صديقي يعرف هالمشكله عندي .. وكنت في بيتهم .. ولما قدموا لنا الدجاجه .. عرف اني ماراح اكلها .. فقال ... تبي نلسبها سروال عشان تاكلها ... ولا نلحفها بالعيش عشان ماتشوف عريها .. قلت لا .. انا اصلا  ... ماقمت احب شي اسمه دجاج ... عقدتني هالدجاجه 

ليست هناك تعليقات:

إرسال تعليق

جميع الحقوق محفوظه © أجنحة وقلوب

تصميم الورشه