وكأن اليوم امس

0
سأدخل بالموضوع مباشرة .. ربما لاحظتم كثرة تغييري لقوالب المدونة .. والسبب يعود لحظي السيء انه كلما وجدت قالبا رائعا كان به نقصا .. فاما ان يكون القالب لصاحبه فقفله ونام عليه فلا يمكن اضافة ولا يمكن من تغيير ..واما ان يكون القالب اجنبي وقام بترجمته شخص ما .. فهم شيئا ما  .. فظن نفسه اديسون او ان الشمس تطلع من اذنيه .. وان الارض لا تدور الا بيديه .. لذا قررت الطلاق من كل القوالب الجاهزة .. طلاقا بائنا تاما بالثلاث .. ورجعت اليها نادما .. تلك هي بلوجر الحبيبة.. بقوالبها التقليدية والتي تبقى  افضل بمائة مليار من قالب جاهز .. ترجمه لنا شخص منتفخ .. كأنه يمشي على الهواء .. وينظر لنفسه انه سلطان علمه وزمانه .. ونقول له .. ان ماتكبر غير الزباله ( وانتم بكرامه ) ..  ولا يرتفع غير الدخان ... وان كنت عملت عمل طيب فاكمله بالطيب .. المشكلة .. ان اللي يترجم هذه القوالب يرغمنا بالقوة على وضع مدونته بالاعلى .. ويبحث عن مليون كود عشان يثبته ولا احد يقدر يشيله .. ياسيدي احنا نضع المدونات الصديقه في مدوناتنا بدون كودات وبخاطرنا .. وبدون مقابل لمجرد احساسنا انهم يستحقون هذا الشيء .. يعني ماله داعي لهذه الحركات اللي تجبر المدون انه ينزل القالب على مضض .. هذا التصرف المزعج غير المهذب .. اظهرنا امام العالم متخلفين .. .. نعم من حق المصمم الذي تعب في الترجمه ان يضع له سطر تحت وكتيمي ..  محدن يشوفه .. لكن يرفعه فوق ويحط مدونته .. وكأنه الطير الذي لا نريده .. طيب ليه نسيت تليفونك وسكنك وعمرك وسيارتك .. وبالمره اسم اصدقائك واقربائك وجيرانك .. مدري متى نرتقي مدري .. زميلتنا الغالية بوك مارك نبهتني لشغله .. وهي وضع التاريخ على المواضيع اللي اكتبها .. هذا الشيء خلاني اكتشف شيء ماكان على البال .. عندما وجدت ان من المستحيل وغير الممكن ومش ممكن كمان .. وبلهحتنا الكويتية حامض على بوزك .. انك تغير شي بالمدونة .. لا لون لا حرف لا رقم .. بس اكتب وبس .. ياسلام .. السؤال اللي ينام برمتنا .. وش تستفيد من هالشيء .. انت تبي تخدمنا ولا تبي تذلنا .. انت يامصمم زمانك .. لما فكرت ترجم القالب وش قصدك فيه .. تجسس او اعلانات لك او رغبة بالشهرة .. ان كان قصدك تجسس .. فثلاثة ارباع المدونين كتاب مسالمين .. وان كان قصدك اعلانات لك ورغبة بالشهرة .. ارسل لنا رسالة نضع صورتك ومواضيعك وحتى رقم فنيلتك في اعلى المدونة .. بس بشويش وبعقل .. اعلانات تترس المنتديات عن هذه القوالب .. ولما ننزلها نكتشف ان السيد المصمم متربع فوق .. ياسيدي انزل ياسيدي رق .. والله ندري انك تفهم بالتصميم .. مالت على الباميه لما تنقلب كوسه .. اتذكر لما كنت بالمتوسط كنت من هواة الشات .. وفي مره .. دشيت بسكربت واخذت اكلم صديق عن هذا السكربت .. وانه حلو وزين وولد حلال .. وبعد دقائق دش (دخل) علي شخص برايفت .. قال لي شكرا .. استغربت ورديت عليه من حضرتك .. قال انا صاحب السكربت وحبيت اشكرك على مدحك للسكربت .. فاكتسفت ان اخونا ( زارع ) كود تجسس بداخل سكربته .. ولكم انكم تتصورون لو بنت صغيره قادها حظها العاثر .. بالدخول في هذا السكربت .. واخذت تسولف مع صديقتها باسرارها الخاصة وشلون يقدر يستغلها .. هذه النفوس المريضه متواجدة بكثرة عندنا .. احنا العرب شاطرين بالتربع فوق والهكرز وصور البنات والمغازل .. لكن نبحث عن علم .. عن فائدة .. عن بناء واصلاح ..  القليل منا اللي يفكر بهذا الشيء .. ونقول للي يترجم لنا القوالب .. ويرغمنا على وضع اسمه ومدونته وطوله وعرضه .. نقوله ان كنت تبي الشهرة او تبي الناس تعرفك افعل شيء يخدم الانسانية ..  ابتكر شي مابتكره غيرك ولا قام به غيرك .. عشان يبقى ذكرك .. ونقول لاصحاب المنتديات اللي هابين هاليومين في منع اي شيء يقرا او ياخذ منهم شيء الا بالتسجيل .. نقول لهم .. لو ان الشركة المبتكرة لهذه المنتديات لو تدري انكم بتسوون هالشي يمكن تراجعت .. او سوت شغله منعتكم من منع الناس من دخول برنامج عالمي .. وضع في الدرجة الاولى لخدمة الناس والبشرية كلها .. وش هالعقول .. وش هالتفكير .. وشلون تفكر سبحان الله ... بالمناسبة .. فيه غبي سألوه كم عمرك فرد والله مدري يمكن يكون في البيت .. ولي نكتبه احنا عارفين ودارين انه مامنه فايده .. العالم يتقدم واحنا نتأخر .. العالم يبتكر .. واحنا نخرب .. العالم يخدمنا واحنا نحاربه ونقاتله ... يلا بروح اشرب قهوه .. منزعج حدي .. الله يرحمك ياسعد زغلول لما قال غطيني ياصفيه مافيش فايده .. بالمناسبة انا غيرت رأيي .. واخترت قالب من القوالب اللي يسويها الاخ حسن .. هذا الرجل يبقى افضل بكثير من غيره ... اتمنى ان قهوتي مابردت .. اللهم اني بردت جبدي

ليست هناك تعليقات:

إرسال تعليق

جميع الحقوق محفوظه © أجنحة وقلوب

تصميم الورشه